1.
Хоржоонт илбэчин мэт хагацлын тухай
Холоос санахад, тэр - хагацал биш.
Залуу нас минь нэгтээ үлдэв үү, нэгэн тийш одов уу?
Залуу насны тухай эндээс санахад, тэр - залуу нас биш,
Хоосолж тавьсан жирийн л нэг хундага.
Харин амтыг нь мартжээ.
Холоос санахын хэрээр шаналал бүхэн зугаа болжээ.
Өхөөрдөм зугаа л байжээ.
2.
3.
Тэртээ өчигдрөөс дүн-н-дан-н:
Тэмээн алхаа, хонхон дуу.
Анхилуун, бөх нойрон дээгүүр
Алхаж гарах зуун тэмээ.
Зуугуулаа миний бодлыг хуваан тэгнэж
Цуваа болоод, үүрдийн зүгийг тэмцэнэ.
Тэнд миний төрж чадаагүй хүүхдүүд
Тэнгэрт очиж мөнх наслахаар явна.
Арван таван жилийн цаадтайх зүүдэн дээр
Алаг үрс минь, юунд нулимс унагана?
Аавынх нь найрагч байх үеийн тэмдэглэл
Амгалан нойрсог ээ!
Нулимсгүйгээр, тэд!
1996.5.13-24.
Г.Аюурзанын цуврал гурван романы хоёр дахь нь болох "Арван зүүдний өр" 2005 онд анх хэвлэгдсэн.
Зүүд судлаач, интернет сайтад зүүдний тэмдэглэлээрээ цуврал нийтлэл хөтлөн бичдэг хүн, зүүдээр наймаалцаж сольсон гар бичмэл, гол баатарт нь зүүдлэгдэж буй эсэн бусын зүүд, зүүд мэт амьдрал... Товчхондоо зүүдний мэт үйл явдлууд өрнөдөг энэ романыг Оросын монголч эрдэмтэн Мария Петрова "Монголч эрдэмтдийн хувь заяаны тухай роман" хэмээн уг номын талаар Санкт-Петербургт тавьсан илтгэлдээ дурджээ.
Роман орос хэлнээ орчуулагдаж, 2010 онд хэвлэгдсэн байна.
Энэ зохиол харилцан шүтэлцээ бүхий нөгөө хоёр романыхаа хамтаар "Гурамсан цадиг" нэрээр шинэчлэгдэн хэвлэгдсэн бий.
2006 онд анх хэвлэгдсэн энэ ном нь өөр хоорондоо харилцан шүтэлцээ бүхий өгүүллэгүүд, мөн хавсралт эсээнээс бүрдсэн метароман юм. 2009 онд "Хүүрнэл зохиолын товчоон" нэрээр ботилогдсон эмхэтгэлд нь мөн оржээ.
Зохиогчийн залуу насны нэлээд хугацаа өнгөрсөн Москва хотод ихэнх үйл явдал нь өрнөдөг эдгээр өгүүллэгүүд далд зөн, ид шидийн аясаараа ижилсэнэ. Хавсралт эсээнүүдийнх нь нэг болох "Хаа нэгтээ буй эмээдээ бичсэн захидал"-ыг та "Тэмдэглэл" хэсгээс уншиж болно.
Уг ном 2007 онд солонгос хэлээр орчуулагдан Сөүлийн "Erum Books" хэвлэлийн газарт хэвлэгдсэн бөгөөд ОХУ-ын утга зохиолын сэтгүүлүүдэд "Орос цэрэг", "Хаа нэгтээ буй эмээдээ бичсэн захидал" нь орчуулагдан гарчээ. Мөн энэ ном дахь "Бурханы шарил", "Мууран хүмүүсийн сүүдэр" өгүүллэгүүд англиар орчуулагдан нийтлэгдсэн байна.
Хөгжүүлэгч: BAACHKA, Source: BaA4ka v2.5